发布时间: 2023-12-29 23:03:12
*相機聲效
就喺我影緊相嘅時候，我透過一塊落地玻璃反射到後面嘅遠處出現一個人…嗰個就係我第一日嚟到新宿喺便利店撞到嘅動漫女仔！當我同佢四目交投之後，佢竟然迴避我嘅眼神，然後跑走咗！
我當下唔識反應…佢跑走係因為佢認得我？但認得我其實唔駛跑走架？唔通佢怕我向佢搭訕？嗱，我自問我嗰樣都尚算正常，唔似係咩壞人啊？點解佢要咁驚呢？
就係一連串疑問之下，我決定向佢跑走嘅方向行過去！而我眼尾望到佢嘅身影，佢入咗𨋢落地下！
我知跟蹤佢會令成件事變得更詭異，但我唔理好奇心會唔會殺死貓，我順住自己嘅直覺，入咗另一部𨋢落地面！
*升降機聲效
話咁快我就由52樓落到地下，點知六本木森大廈嘅景色同我啱啱嚟嘅時候好似完全唔同曬，因為馬路兩傍嘅所有樹木全部著曬藍白色嘅燈。六本木一直都係東京睇聖誕燈飾嘅熱門景點，呢度嘅大型商場設置歐陸式嘅大型聖誕裝飾，而所有樹木都裝上超過數十萬嘅藍白色燈飾，令途人有置身於銀河嘅感覺。突然間，令我諗起香港海傍嘅聖誕燈飾。坦白講，香港嘅聖誕燈飾係童年回憶，就算欣賞咗好多年，但每年都要嚟睇吓，先覺得係過聖誕節。不過六本木嘅感覺好唔同，因為啲裝飾好近，近到你可以摸到咁。而正當我係被呢一片白色樹海吸引住嘅時候，我聽到不遠處有腳步聲，嗰位動漫女仔又出現！佢背住我，欣賞緊呢片白色樹海後面嘅東京鐵塔！
佢戴住一頂紅色冷帽，圍住墨綠色頸巾，著住一條白色長裙，再加上一件黑色皮褸，同之前嘅文青造型好唔同。而佢定神咁望住景色嘅樣，又真係幾吸引。而我怕嚇親佢，所以我就匿埋喺其中一棵聖誕樹後面，望住佢。當佢緩緩轉身嘅時候，我就即刻縮埋，怕佢發現到我…
跟住，佢由六本木開始出發，沿住馬路一直向表參道方向行。而我…就好似無間道梁朝偉跟住劉德華咁，一直喺後面默默跟住佢。佢一路行，一路聽緊歌，唔知佢聽緊咩歌呢？All I want for Christmas is you? 定係Last Christmas 呢？
呢個時候，我又拎部電話出嚟，學佢撳首聖誕歌嚟聽。
唔知我同佢會唔會咁啱聽埋同一首歌呢？
哎吔！一諗到呢度，就覺得成件事更詭異。如果有傍人睇到我跟住佢，就一定會覺得係啲聖誕殺人恐怖片。而動漫女好似無發現我，因為佢好留心欣賞表參道嘅燈飾，仲不時露出驚訝嘅神情添。就係咁，我跟住佢由六本木行到去表參道，再行去原宿，嚟咗一程東京聖誕燈飾漫步，經過40幾分鐘嘅腳程，聽住一首又一首嘅聖誕歌，佢喺原宿站停低咗，再轉方向行去澀谷。
呢個時間已經唔多行人，成條街好似得返我同佢仲有啲聖誕裝飾…我其實都唔知要跟佢跟到幾時，只係知道咁樣跟住佢漫步，有啲浪漫，又有啲過癮。同一時間，我諗緊好唔好同佢打招呼…而諗下諗下，我哋就到咗《咒術迴戰》其中一個著名景點澀谷站。
我腦入面閃過好多愛情電影偶遇嘅情節、橋段同對白，不過計畫趕唔上變化…因為動漫女喺入閘前突然加速跑入閘！
我即刻拎張西瓜卡啫入閘，然後好努力穿過重重嘅人群希望可以趕上去，就喺我差啲趕到之際，就發生最老土嘅情節…佢上到車，而我就仲留喺月台…
【Zip噏劇場】期間限定 100% FF 遊記 - 「Shinjuku 新宿故」Day 5 night part2
歌：羊文学 - more than words (Official Music Video) [TVアニメ『呪術廻戦』「渋谷事変」エンディングテーマ]
PS. 圖：森ビル株式会社／來源
Leave a comment and share your thoughts: https://open.firstory.me/user/ckyhgwclu0xlr08721i22wc7k/comments