发布时间: 2023-12-07 23:02:34
【Zip噏劇場】期間限定 100% FF 遊記 - 「Shinjuku 新宿故」Day 4 富士山(上)
除非你係好厚面皮嘅人，否則，有啲古怪嘅想法或者尷尬嘅請求，係好難無端端開口。就喺兩位澳洲遊客邀請我同佢地，仲有導遊兼bar tender - kinaka 食燒肉嘅時候，佢哋兩個得知我聽日去富士山一日遊，然後比我睇早幾日Kinaka帶佢哋行下吉田同河口湖嘅相，我內心就生出不如請Kinaka做我導遊嘅想法。但因為呢個諗法太大膽，所以我只係閃過一下呢個念頭，然後就同佢哋乾杯。但人在異地就係熱情奔放啲，我唔係講我，而係James 同 Lily。佢哋一啖飲晒杯生啤，然後就同我講: Akira, you should invite Kinaka be your tour guide!
Akira係我食飯嘅時候自我介紹嘅名…會咁叫唔係因為《阿基拉》呢套電影，而係《殭屍100～在成為殭屍前要做的100件事～》入面嘅男主角叫天道輝，而我又叫阿輝，所以喺自介嘅時候叫自己做Akira…
對於James 同 Lily 突如其來嘅提議，我就唯有用飲酒化解尷尬…大佬，我問完但如果Kinaka拒絕咁點喎…所以我就一啖飲晒杯生啤，但同時眼尾望下kinaka…佢同我一樣都係飲酒迴避James 同 Lily嘅提議，然後成餐飯，我哋都無再講過呢個話題。
兩個鐘頭飲飽食醉之後，James 同Lily就要返酒店執行李準備聽朝出發到大阪，而Kinaka就要返一返黃金街嘅酒吧，我酒店都喺嗰邊，所以就同佢一齊行。喺到黃金街同我酒店嘅十字路口，佢突然問我: 你聽日真係去富士山？如果你唔介意，我可以做你導遊啊。
嘩，由佢親自開口問，如果我拒絕，咪會影衰晒所有港男兼響到日港關係！所以，我即刻答:係！多謝你！
*JR聲效
去富士山最快嘅方法係買富士迴遊直到富士山，不過我太遲買飛，所以只可以買到新宿到大月站嘅車飛，想去富士山嗰邊就要轉坐普通列車，車程總共2個半鐘。Kinaka約咗我朝早9點喺新宿JR度等，喺車站入面買咗盒江户前壽司，就一齊準時搭JR。我選擇今日去，真係好好彩，因為今日富士山嘅能見度係最高…同埋Kinaka嘅JR pass聽日到期！
而喺車上面，佢問我嘅工作同嚟日本嘅原因。我只係話比佢知我係編劇，但就無講到我原本嚟係慶祝週年紀念但出發前分咗手。而短短嘅車程，我哋無因為早起而覺得眼瞓，反而越講越興奮。因為大家都有共同嘅話題 - 電影。大家都分享咗鍾意嘅戲，佢由演員角度去講，我就由編劇角度出發，講下講下，直到一個位，我就停咗…因為，我終於見到富士山啦！
我透過車窗望到富士山。今日萬里無雲，巨大嘅富士山好清晰咁出現喺我面前！由於天氣開始涼，山頂已經冠雪，而山腳就係一望無際嘅田野，望到呢個只係出現喺電腦螢幕保護畫面或者post card 嘅景色，我腦袋一片空白，一時三刻講唔到野。而Kinaka就報以微笑，話一陣帶我去唔同景點用唔同角度望富士山。
今日嘅第一站係下吉田。好多人好鍾意喺下吉田嘅商店街影富士山。果然，一到打卡位就有好多遊客嚟到，然後搵機會衝出馬路擺pose影相，所以當局都放咗提示版叫人唔好咁做。至於成效就…好似無乜作用。但我明嘅，喺一條充滿歷史味嘅昭和年代商店街嘅盡頭，出現一座富士山，喺度打卡就可以感受晒兩種截然不同嘅日本靚影，係幾特別嘅。我影完啲人衝出馬路打卡之後，Kinaka就帶我行去另一個景點 - 忠靈塔。
位於新倉山淺間公園嘅忠靈塔喺佛教嘅五重塔建築，如果夾啱時間，就可以影到大大嘅富士山加開滿櫻花嘅忠靈塔，係熱門打卡點之一，不過就要挑戰大家嘅體力，因為要行好多級樓梯。好彩今日天氣清涼，行山都唔算好熱。而用咗30分鐘，我哋終於由第一級行到上忠靈塔！撇除好多遊客，呢個角度望富士山都係好靚嘅。中式佛教建築，翠綠整齊嘅園林，加埋180度無敵開揚嘅富士山靚景。呢個距離加景色，令我始於欣賞，終於忘記手上嘅相機。
*菲林機聲效
Kinaka笑一笑，原來佢見到我好似大鄉里出城咁，忍唔住用佢部菲林機影我望住富士山嘅樣。呢個時候，我都用相機還擊，即係影返佢相。話咁快，有傾有講就喺下吉田遊覽咗幾個鐘，然後我哋就出發另一個熱門睇富士山嘅地方 - 河口湖。
唔駛20分鐘，就由下吉田到河口湖站。一出閘，就聽到有人大叫kinaka。我向聲音嘅方向望過去，見到一個著住黑色t shirt，牛仔褲，推住單車，大約30歲嘅男人喺閘口出面嘅巴士站經過，而Kinaka見到佢，微微一笑，同佢揮一揮手，而透過佢望住呢個男人嘅眼神，編劇嘅直覺話比我知，呢個男人係佢今次嚟河口湖嘅主要原因…
*歌：宇多田光《First Love》
編劇及製作：阿攝
音樂：Blue Giant OST - Motivation、Omelet rice、Day by day
本集景點：
1.下吉田商店街
2.忠靈塔
3.河口湖
Leave a comment and share your thoughts: https://open.firstory.me/user/ckyhgwclu0xlr08721i22wc7k/comments